Geduld

Lees Galasiërs 5:22

Dis seker nie verniet dat een van die minder gebruikte Engelse woorde vir geduld “long suffering” is nie. Wat ‘n sprekende woord – long suffering! Geduld met ander se tekorte, gebreke en fabrieksfoute is lang lyding! Dit is myle ekstra se loop.

• Geduld is om stil te bly wanneer ek eintlik somtyds my sê wil sê.

• Geduld is om elke slag van vooraf met iemand anders te begin deur gister en eergister se swart boeke toe te maak.

• Geduld is om regtig te leer buig – voor God en ander mense – en om bereid te wees om viool nommer twee te speel ter wille van die redding, herstel of geestelike groei van iemand anders.

• Geduld is om ander vir die hoeveelste keer te vergewe en nogmaals te aanvaar. Dis om aanhoudend te hoop, teen alle hoop in, dat iemand gaan verander.

• Geduld is om my eie vooropgesette idees soms ter syde te stel en ruimte te laat vir die menings en standpunte van ander mense. Nee, ek hoef nie elke slag reg te wees nie.

• Geduld is om na mense deur die oë van Christus te kyk.

Gebed

Gee my asseblief vandag ‘n ruim porsie geduld, Gees van God. Amen.