Word ‘n kind

Lees Matteus 18:4

Vele wyshede kom uit onskuldige kindermonde, nie waar nie? Miskien moet ons meermale na hulle luister. Nee, miskien moet ons ook self weer egte kinderharte kry, soos wat Jesus in Matteus 18 van ons vra. Kinders is waagmoedig, onskuldig, gelowig, leergierig, nuuskierig en avontuurlustig. Elke dag sit die lewe ‘n groot sak vol nuwe opwindende uitdagings voor hulle lewensdeur neer. Ons as grootmense daarenteen, is egter al so voorspelbaar, vervelig en geroetineerd as wat kan kom. Ons avontuurlustigheid en lewenslus is lankal reeds deur die harde grootmenswêreld in en rondom ons gesteel. Ons lewens het net te geyk geraak.

Kom ons neem vandag dan Jesus se uitnodiging ernstig op en word weer kinders. Onthou, Hy sê ook dat die koninkryk van God net vir sulkes bedoel is. Die Gees se nuutmakende werk wil ons juis kleiner en minder vol van onsself maak. Hy wil ons kinderlik laat buig voor ons Hemelse Vader as ons enigste Heer. Die Gees maak ons lief vir God en lojaal aan Hom. Hy dryf ons keer op keer in ons Vader se oop arms in. Die band van liefde, wat die Gees in ons werk teenoor God, kan nie in woorde uitgedruk word nie. Dis ‘n diep fontein van liefde, wat gedurig in ons opborrel en oorvloei in ‘n nederige, liefdevolle band met God.

Gebed:

Laat my weer ‘n kind word in U teenwoordigheid, Here Jesus. Amen.